اسلام آباد: سابق صدر اور پاکستان پیپلز پارٹی (پی پی پی) کے شریک چیئرمین آصف علی زرداری نے پیر کو عام انتخابات 2024 میں کسی بھی سیاسی جماعت کے ساتھ سیٹ ایڈجسٹمنٹ کے امکان کو مسترد کردیا۔

ان خیالات کا اظہار پیپلز پارٹی کے شریک چیئرمین نے لاہور میں پارٹی پنجاب کی قیادت سے ملاقات کے دوران کیا۔ ملاقات میں آئندہ عام انتخابات کے حوالے سے پیپلز پارٹی کی حکمت عملی پر غور کیا گیا۔

سیٹ ایڈجسٹمنٹ کے امکان کو مسترد کرتے ہوئے آصف زرداری نے کہا کہ پیپلز پارٹی آئندہ عام انتخابات ’’اپنے بل بوتے پر‘‘ لڑے گی۔

انہوں نے نشاندہی کی کہ پی پی پی کو ہر حلقے سے پارٹی ٹکٹوں کے لیے متعدد درخواستیں موصول ہو رہی ہیں اور اس عزم کا اظہار کیا گیا کہ وہ "مضبوط ترین امیدوار" کو ٹکٹ دیں گے۔